Соработката помеѓу Audemars Piguet и Swatch беше без сомнение најголемиот часовничарски настан во 2026 година. Колекцијата Royal Pop беше претставена на 13 мај, а продажбата започна на 16 мај во околу 200 одбрани Swatch продавници ширум светот. Уште првиот ден се создадоа огромни редици, а на неколку локации продавниците мораа привремено да затворат поради безбедносни причини. На социјалните мрежи кампањата генерираше повеќе од 25 милијарди прегледи, додека извршната директорка на Audemars Piguet изјави дека официјалната веб страница за само еден ден добила повеќе од десет пати повеќе посетители отколку во целата претходна година. На Chrono24 интересот беше рекорден и достигна 2,9 пати поголема побарувачка од легендарниот MoonSwatch од 2022 година, а просечната препродажна цена во првите денови изнесуваше околу 1.440 евра, иако официјалната цена беше само 385 до 400 евра. Според финансискиот извештај на Swatch Group, токму Royal Pop беше еден од главните двигатели на растот во првата половина од 2026 година, при што продажбата на групацијата порасна за 8,5 проценти на 3,12 милијарди швајцарски франци, и тоа во период кога извозот на швајцарски часовници глобално опадна за околу 0,7 проценти. Сепак, критиките не изостанаа. Голем дел од колекционерите сметаа дека Audemars Piguet ризикува да ја наруши ексклузивноста на Royal Oak, додека други тврдеа дека се работи за одличен маркетиншки потег кој донесе нова публика во светот на механичките часовници. Денес може да се каже дека ова не беше само краткотраен интернет хајп. Колекцијата донесе огромна посетеност, рекордна побарувачка и мерлив раст на продажбата, но истовремено се покажа дека препродажните цени почнаа да паѓаат само неколку недели по лансирањето, па купувањето по неколкукратно повисока цена тешко може да се оправда. За оние што успеаја да купат по официјална цена, Royal Pop претставува интересно парче часовничарска историја, но за останатите најдобро е да не дозволат моменталниот хајп да ја диктира одлуката за купување.
Comments